Kan thawnthu

          Amah chu mi vantlang pangngai a ni a, mite aiin a hleitlingin a ropui hran lo, mahse ani chu ani a ni. He hringnun zinkawngah hian ka nun khalhtu ka nih chhung hian a hmêl pawh vawikhat chiah ka la hmu! Mahse ka tan chuan a aia Dorothy leh chuang dang hi an awm chuang lo.

         A pa chu pastor a ni a, ka pa ve thung erawh chu kohhran upa, a nu chu lehkhathiam, ka ngaihsan êm êm a ni a, ka nu chu ka nu a ni. A naupan tet lai aṭangin uluk taka enkawl a ni a, keiin perhpawng ka laih laiin ani chuan o..n..e..one a lo ti lauh lauh tawh a, kahṭhek hmanga kan indo laiin Tom Sawyer a lo atchilh daih tawh. Hmeichhiaah chuan amah ang hi an tam ka ring lo. Mahse inanna pakhat kan nei! Kan inngai ṭhin, hmanlai inngai ka sawi lo va, lungleng taka awmin kan inthlahlel a, hmun hrana awm chungin hmun khatah kan hlim dun em em ṭhin. Mahse, kan inṭhen! Chu chu a ni ‘kan thawnthu’ chu.

          A hming pawha ko phal lovin ‘ka nau’ tiin ka ko ṭhin a, a nuin duh taka a phuah ‘maria’ tih chu ka ni tin ngaihtuah a ni. Zan khat chu, “Lo leng rawh,” a tih tlat avangin ka va leng a. Chu chu a ni he leikum chhiar a, chakna avanga kum sawmriat kan dam theihna khawvela kum sawmriat thlen min tihuphurh tu chu. A nu hriatpui thlapin kan inkawm a, a biangsum lang fiah kelh mai hmachhawn chunga min han nuih lai te khan thli hi a thaw nge thaw lo tih pawh hre lovin ka ngaihtuahnaah ka cheng a. Zakzum angreng tak a ni a, kei aiin a naupang na a, a ngaihtuahna chu ka um a ngaih chang a awm. A chang erawh chuan naupang duhawm tak hi a ni a, thil min dil se a petu nih chu ka chanvo ni reng se ka duh ṭhinin ka ring. A ngaihawm tih hi a bula ka awm lai ngei ngei pawh khan he ka chhia leh ṭha hriatna hi hrilhin a awm tawh a, a tel lova nun hman huphurhawm tur zia nen lam ka mitthla nghal vekin ka hria! Chu chu a ni ka nau chu.

         Ka ṭhianpain a sawi ka hre reng ṭhin. Nula a bem dawnin Sialton Official thawnthua, “D, if you could see my heart, it is bleeding now,” tih hi ṭuah takin a sawi ṭhin a, tichuan kawng zau taka hawnin a awm ṭhin a ni awm e! Chu thu chu ka sawi ve a ngaiin ka hre lo va, a thawnthu zawk erawh chu a ngai ngaiin ka hrilh a, ngun takin a ngaithla a, kan han chawl a, ka’n nui leh rih ṭhin.

 “Dorothy min ti rawh,”

a tih lai te chuan duh thawh lutuk tih hriat ngawih ngawih hian, 

“Ka Dorothy duhtak,”

te ka han ti ve vel a, thla eng hnuaiah kher lo pawh hian nun hi a lo ngaihnawm thei a ni tih te pawh hi kha kan thawnthuah khan a tel a ni. A duh dan a nih loh chuan min hnial mai a, rilru sual an tih ang leh ngaihdan ṭha lo an tih ang hi amahah khan hmuh tur a awm lo, a ngaihdan a nih loh chuan a nuar thiam a, a ngaihdan chuan leilung hi a nu siam emaw tih chang nei ni awm tak....luhlul, ngaihawm si a ni! 

        Mahse, harsatna harsa tak kan inkarah chuan a awm a. Theih loh tih hi midang nunah ka lo nembel tawh ṭhin a, ka nunah hian he thumal hi rorel tir ka tum ngai lo. Neih aia neih loh ka ngah zawk miau avangin chu harsatna harsa em em mai sukiang tur erawh chuan ka chaknate hian thahrui an nei lo va, a tuartu chu kei leh ka nau chu kan ni ta a ni.

        A chinfel dan kan ngaihtuah ngial a, kan pahniha kan ngaihtuah pawhin a fel thei lo va, a hnua keimah chauha ka ngaihtuah leh pawhin a fel thei chuang lo. Khawvelah hian Indopui te meuh pawh chinfel a ni a, thlipui tleh hlen ta a awm pawh kan la hre lo. Ruah a sur pawhin a bang leh ṭhin, mahse he harsatna hi chuan siamṭhat a duh a, mahse a hmanrua kan neih hi a chau em atin ni. 

“Vawikhat mah rawn leng tawh suh. Ka haw ngawih ngawih che,”

tih te hi a zan hnihna a ka message dawn a rawn ni chho va, 

“Ka na dawn tih i hre sa reng a, mahse dan i tum lo, ka hua che,” 

tihin a zui a. Chhan ngaihna reng reng ka hre lo. Fanghmir kawchhung induan dan ka hre lo va, chawngzawng ke pen chelhdingtu hi a awm tih ka lo ngaihtuah ngai lo a ni ka nau.

          Ka nau, vut aiah pangparṭhi te, ṭah aiah nuih te, lungngaih aiah hlim te, mangan aiah lungawina te hi a phû hnenah chuan zah takin ka hlan a, lungawina kianga hlimna luipui luang ri hum hum sira hahdamna hlimah chuan chawl la, ṭahna zára nuihna fangkhat chu i tan lo ni ṭhin rawh se. Nangmah leh nangmah inbum i tum a, min kalsan thei emaw i inti a, mahse i thinlung hmun khawi emaw laiah khan bu ka khuar tih i hre si lo tiraw. Ni lo, i hre leh si a nih kha, a ngai ngai hian a ngaihnawm ka ti, vawi tam tak ka chhiar tawh hnu mah ni se, a ngai ang ang hian ka ziak leh mai teh ang,

“Mahs, hei hy k chah duh ce, nupui i neiha, kei phn pasal k neih hnu ph nise, i kum te lo upa in emw, taksa borhsom tk, natna emo ph lo tokla..Kan in hi i hria a, i hun tawpah tal cn, i kut vuanin...Nag fawpin ka rn thlah liam ag c, k aia i liam hmasa anh cn...Pathian phn mn hretyam em ag cu! hria m,”

ka hria asin ka nau, Pathian hi i lamah ṭangin chu hun chu i duhthusam ang ngeiin a thlentir ang tih ka beisei.

          Eng tikah emaw chuan thlifim a thaw leh heuh heuh ang a, sava an thlawk leh lêp lêp ang a, chawngzawng ke pen takngial pawh hi a la ding leh ṭhin ang. Khua a lo ṭhal ang a, ṭuahpui leh vaú an lo vul leh ang a, thanghniang, chu tih hunah chuan i tel ve dawn si lo! April pâr pawl a lo pâr ang a, nun hi a ngaihnawm thar leh ṭhin dawn asin. 

          A chhan leh vang lam zawng ka hre pha hauh lo. I tel lo hian zan khat rei em em hi lunglêng takin ka tuar ang tih tun kum sawm kal ta chhung khan ka lo hre ngai lo. Nun hi i tel lo hian a ngaihnawm thei ang a, i awm lohna khawvel hi a hlimawm thei ang tih ka rinhlelhna hian tun thla thum chhung chu min ṭinsan thei reng reng lo. 

       Ka tlin lohna leh ka fel lohna ang ang hian min pawm turin ka beisei lo che a, keimaha a ṭha ber awm zawng zawng hi i tan hlan mah ila i tan ka vul thei chuangin ka ring lo. Vawi tam tak ka lo ṭap ve tawh a, hmangaih(?) ka lo ni ve tawh a, hnawl leh hnar te pawh ka lo ni ve tawh si a! Hun kal tawh hi ka lo vai liam tawh a, khawi lai kawng kawiah emaw chuan a tlan chak ber berah ka lo ṭang tawh si! Khang hun lai te khan i awm tih lo hre tawh ni ila vut aiah parṭhi ka awrh ve thei tur! 

          Hun hian ka nunah hian i tel ve a ni tih min hrilh ṭhin a, lawm tur nge lawm loh tur tih phei zawng ka hre lem lo. Tunah hian van Pathian hian ka duh ber min dil ta se, inthlahrung takin ‘I kiang a awm,’ ka thlang ang. Hun tam tak hi a ral tawh a, a ral mêk bawk, zan a liam a, ni a lo chhuak leh a, tlai a lo ni a, a tla leh mai ṭhin. Mahse tlai ni tla hian ka ngaihna che hi a liampui ngai si lo. Zing khua  a lo var a, i zun ngai bawk hian ka khua a har leh ṭhin. Maria, sawifiah thiam ni ila aw... Nimin ral ta khan nang min ngaihtir a, la ral ve lo ka tun hun pawh hian nang lo chu ngaihtur dang a nei si lo. Aw, he nun thlalera ka hun ve zawng zawng hian keimahah hian i tel reng ṭhin tih min hrilhnawn leh ṭhin!

Ni khat hi chatuan ni se, chu ni khat chu kei chuan i tan hlan ka duh ang a, ka theihna neih ve te hian i sir an bel ang a, cho lo mah ila khawvel hi zuam lo chung chung pawhin hmachhawn turin ka theihnate chuan beiseina hma chhuanin ral an do leh awm si a. A ni, chu hmunah ngei chuan ka mawi ve na leh ka duhawma neih ve ang ang nen hian i thliah atan par ka duh ang. Mahse ka nau, par mah ila min thliak ngai dawn si lo tiraw? He thu ka ngaihtuah chhuah apiang hian eng nge maw ka nih a, he khawvelah hian ka la dam ve reng le ka ti thin asin! Par ve si a, i thliah atan ni lova vul chu a pamhmai ka ti a ni!

Chuvangin, ka neih chhun leh ka mawina hmachhuan ve tur thil tlemte nen hian ka liam mai ang e, ka beiseina nen ka beisei ramah zalen takin ka lo hmuak che ang a, chu tah chuan nang nen hian kan vul ve thei tawh maithei asin. Derhken leh Ainawn an vul ang a, chawrno lo zeta ka lo liam ta a nih pawhin ka beiseina chuan pialralah i tana par ve turin a zahawmna zawng zawng hming chhalin nun hi zah tak chungin a mangtha tih i lo hre ṭhin dawn nia.

Mihring nih hi a ropui ka ti a, mahse min siamtu duh dan pela nun erawh a ropui ka ti lo va, chuvangin mi chak lo tak mihring ka ni hi ka zak ṭhin.

I mitin khua a la hmuh theih lai leh, i ke phah lum ngeiin nun hi a la rap kal tih ka hriat chhung erawh hi chuan chaklo mah ila ka vui ngai lo vang, nang hlim takin i awm ṭhin si a.

 Nun hi a pangngaiin a la kal reng a, Nî pawhin a chhuah hun a la vawng dik a, ruah pawhin bân hun a hria, kei erawh chuan i tel lohna khawvel chu hriatthiam hun reng ka nei ve ngai dawn lo a nih hi. Hriat loh ka nei tih ka inhriat chhuah apiang hian ka hre chhuak ṭhin che asin!

Kum a liam ang a, senhri an lo vul leh ang a, lelte a lo kiu ang a, thlifim a lo thaw heuh heuh ang a, ruah huangtau a rawn sur leh seng seng ang a, artukkhuan par takngial pawh a lo vul leh dawn asin! Chutih hunah te chuan ngawi rengin lalhniang eng tizia nge kan la ti ang a, he thu hian a ngaitein nunhlui ngaia hi min lenthlu leh dawn a lo ni…

Ka Nu lungthlu lova khiang awih zawng,

|uahpui leh vau an vul Zolentu hnuaiah,

Di kan tawng kan ṭah a ṭul leh ṭhin…

                   I tan, 

                   I hmangaih.

Tichuan, nun hi a hlimawm i tih chang te chuan min lo hre ve thin la, kum a lo vei ang a, ‘Never Alone’ tih hla ka ngaihthlak apianga ka lo hre chhuak ziah ṭhin dawn che ang hian a thianghlimnate nena April par pawl lo par vul chik chêk i hmuh apiangin min lo hre chhuak ve ṭhin dawn nia. 

Hmun hla takah awm mah la, i kiangah ka awm reng ṭhin tih theihnghilh lo la, ka hmuh phák loh vah, ram hla takah i la kal pawh a ni thei, kan inṭhen avang mai hian ka mangṭhaah che ngai suh. Ngawi rengin ka zui reng ṭhin ang che, harsatna i tawh hun a lo la thleng ang a, i la mangang mai thei, a chhan chu thlipui tleh ṭhin hi a tleh tawh ngai dawn lo tih ka tiam thei lo che tih ka hrilh tawh che kha. Mahse lungngai suh, i miitui te chu i hlimna vang zawk a lo la ni ang a, hah taka i lo haw hunah he leilung leh a siamtu hian lawm takin an lo la hmuak dawn che asin. Harsatnate chuan hnuchhawn che se la, an tihtur hriain angelte chuan veng che rawh se. Tichuan, chu tih hunah chuan kan thawnthu hi a bul aṭangin kan ṭan ṭha leh dawn nia.

I'll be in every beat of your heart 

When you face the unknown 

Wherever you fly 

This isn't goodbye 

My love will follow you stay with you 

Baby you're never alone.